Aanvaarding, ten spyte van…

15 05 2011

Daar is baie diewe en rowers in hierdie wêreld. Daar is baie wat lewe aanbied, maar lieg daaroor. Slegs die goeie Herder wat Sy lewe vir ons afgelê het kan egter vir ons die ware oorvloedige lewe gee. Slegs die goeie Herder aanvaar ons onvoorwaardelik.

Jesus kom en beloof in hierdie gedeelte (Johannes 10:10) dat Hy gekom het sodat ons “die lewe kan hê, en dit in oorvloed.” Dit klink goed en lekker. Wie sal dit nie wil hê nie! Soos die een ou gesê het, “Despite the high cost of living, the activity remains popular!” “Ten spyte van hoeveel ons kla oor lewenskoste, bly dit populêr om te lewe…” En Jesus gaan ‘n stappie verder en beloof aan ons OORVLOEDIGE lewe! Moet nie net oorleef nie, lewe oorvloedig!

Baie van ons offer allerlei dinge op, om ons definisie van ‘n oorvloedige lewe vir onsself daar te stel. Gesinslewe word opgeoffer om langer ure te werk. Gesondheid word opgeoffer om harder te werk, alles om – dalk! – raakgesien te word en ‘n beter pos te kry, of om meer geld te maak uit my besigheid. Want oorvloedige lewe beteken mos “the good life”! Geld, goed, karre, dit is mos wat ‘n oorvloedige lewe is…

In ‘n onlangse dokumentêre program wat in Amerika uitgesaai is as deel van die “Frontline” reeks, “The Persuaders”, verduidelik mense wat self in die advertensie bedryf is, hoe die advertensiewese werk (Om ‘n kort 8 minute gedeelte te kyk, klik hier). Nie net om behoeftes by ons te skep vir dinge nie, maar om vir mense “die lewe” aan te bied! Die een persoon gaan so ver as om te sê dat die advertensiewese probeer om die leë plekke in ons lewens wat vroeër deur gemeenskapslewe in kerke en skole gevul is, in te neem.  “Reach out and touch someone.” deur ‘n spesifieke telefoondiens te gebruik. “Because I’m worth it.” vir ‘n spesifieke parfuum. “Be all you can be.” sluit by die Weermag aan! “Connecting People.” as jy die regte selfoon het, om nie te praat van die koeldrank wat “life add” nie!

Hierdie advertensies probeer nie die produkte verkoop omdat dit beter is as die opposisie nie, die produkte beid aan jou ‘n beter, meer vervulde, durf ek sê, ‘n oorvloedige lewe aan! En ons weet dat alhoewel ons gereeld van hierdie produkte wil hê en selfs nodig het, dat hulle nie werklik vir ons ‘n beter lewe gee nie. Hulle breek ook, voldoen nie aan die beloftes nie, tog laat ons onsself telkemale vang…

En hoekom laat ons onsself vang? Ons almal wil graag die beloofde oorvloedige lewe hê, maar ons kry dit nie. Ook nie hier binne die kerk nie!

Ja, dit klink dalk na kettery, maar is dit nie maar ons ondervinding ook hier nie? Hoeveel keer verneuk ons onsself nie hier deur die tweede beste te aanvaar nie!
•    Ons glo God aanvaar ons omdat ons gehoorsaam is. In werklikheid leef ons gehoorsaam omdat God ons aanvaar het.
•    Ek glo ek moet sekere dinge doen om goed van God af te kry. Inteendeel gee god Sy gawes vrywillig, dit wat ons doen, doen ons om vir Hom dankie te sê!

En omdat ons die tweede beste aanvaar, omdat ons wette in plek van genade wil stel, kry ons nie Jesus se beloofde oorvloedige lewe hier in ons gemeenskap as mede-gelowiges nie.

Nee, ons wantrou mekaar eerder. Is bang vir ‘n geskinder as ek eerlik is oor iets waarmee ek sukkel in my lewe. Ons waag dit nie om werklik in verhouding met mekaar te tree as mede kinders van God nie, want ons het al te veel kere in die verlede seer gekry…. So hoe leef ons?  Ons leef op ‘n manier om onsself te beskerm, om ander weg te hou van ons diepste binneste af. Ons is so bang ander gaan ons verwerp as hulle ons ken soos ons werklik is, so ons leef ‘n leuen, ‘n voorgee lewe. Ons kan dit egter nie selektief doen nie, so ons sluit ook vir God uit! So bly die lewe, en dit oorvloedig, buite ons bereik.

Hoe kom ons uit hierdie moeilikheid uit? Hoe kry ons die beloofde oorvloedige lewe sonder om weer seer te kry?

Seerkry mag egter altyd om die draai lê, want ons kan nie in ware verhoudings met mekaar en God staan sonder om ons self oop te stel, om te vertrou nie – soos die skape in hierdie gelykenis moet vertrou, so moet ons Hom ook vertrou!

En ons kan! Want die mens Jesus het op hierdie aarde geloop en verwerping en pyn beleef, sodat Hy ons daarby kan verby lei.

So om die belofte van die oorvloedige lewe waar te maak moet ons dit WAAR LEEF! Ons kan dit nie koop nie. Ons kan dit nie verdien nie. Ons kan nie met God onderhandel daaroor nie. Ons moet hierdie belofte aanvaar uit die hand van die Een wat vir ons so lief het dat Hy vir ons gesterf en opgestaan het. En ons leef dit WAAR deur te leef met die wete, uit die besef dat ons AANVAAR word soos ons is. Ek hoef nie beter klere of ‘n groter kar of ‘n slimmer selfoon te hê nie. Ek hoef selfs nie te probeer om God tevrede te stel deur meer kerk toe te gaan of meer geld te gee nie, Hy aanvaar my soos ek is.

Daar is baie diewe en rowers in hierdie wêreld. Daar is baie wat lewe aanbied, maar lieg daaroor. Slegs die goeie Herder wat Sy lewe vir ons afgelê het kan egter vir ons die ware oorvloedige lewe gee. Slegs die goeie Herder aanvaar ons onvoorwaardelik.

En ons kry hierdie geskenk deur te besef dat ten spyte van wie ek is, ten spyte van wat ek vir ander wil wegsteek, Hy bly oorvloedig lief vir my!

Al soek ek hoeveel keer op die verkeerde plekke geluk en liefde en aanvaarding, alleen by God is daar begrip, Alleenlik God wil ons aanvaar soos ons is en die oorvloedige lewe skenk! Want ten diepste is oorvloedig lewe nie geld, goed nie – wel die nabyheid van God, die nabyheid aan God.

Ons beleef ‘n breukdeel van wat hierdie onvoorwaardelike aanvaarding is in liefdevolle, eerlike verhoudings. Maar dit is slegs ‘n ligte voorsmakie van die volle aanvaarding deur God!  God wil hê ons moet elke dag aanvaarding ervaar, veral ook in die kerk. Dit is juis die een plek waar ons veilig moet kan voel want ons weet as christene alles is genade. Ons is almal ‘n klomp verloste sondaars bymekaar, nie “goeie” mense nie, maar aanvaarde mense. Hierdie oorvloedige lewe is vir almal – jy is God se gesig by jou huis, werk en in die kerk – Leef ‘n lewe van ander aanvaar soos hulle is, God doen dit met jou!

Advertisements




Wat sien jy?

8 05 2011

Wat soek ons in die lewe?  Geld, geluk? As Eugene Peterson, ’n Amerikaanse predikant, reg is, soek mense na twee dinge: wonderwerke en antwoorde. Waarom wonderwerke? Want God kan vir ons dinge doen wat ons self nie kan doen nie. Waarom antwoorde? Want God kan vir ons dinge vertel wat ons self nie kan uitpluis nie.

Die feit dat ons as mense in ’n gebroke wêreld leef, maak dat daar altyd by ons die hunkering is na ’n lewe en omstandighede wat nie die ongelukke, skokke, nare ontdekkings, misdadigheid, teleurstellings, en noem maar op, van ons bestaan reflekteer nie. Die daaglikse sorge en bekommernisse kan ’n mens moedeloos maak – ’n soort magteloosheid bring wat jou van jou lewensvreugde en -moed beroof.

Soms is daar dinge wat met jou gebeur wat geld of mag nie kan regmaak nie. Dit is asof jou hoop in die niet verdwyn, asof die gordyn vir jou gesak het en jy al een is wat met jou nood en bekommernis oorgebly het – nêrens om heen te draai nie, niemand om te raadpleeg nie, nie ’n nommer wat jy kan bel nie.

Soms raak ons so uitsigloos agv dinge wat op ons neerdruk, dat ons die voor die hand liggende, dit wat voor ons oë is, nie sien nie.

Soos hierdie manne wat hier op pad is na Emmaus toe (Luk 24:13-35). Terwyl hulle loop en praat oor dit wat gebeur het, verskyn Jesus self aan hulle, maar hulle herken Hom nie. Selfs toe Hy vra waaroor hulle gesels, kryt hulle Hom uit as ‘n “vreemdeling in Jerusalem”. En dan, as hulle vir Hom vertel waaroor dit gaan, gee hulle hulle diepste gevoelens weer (:21): “Ons het so gehoop dat dit hy is wat Israel sou verlos.”

So gehoop Hy sou die gehate Romeine verjaag, so gehoop dat Hy die Messias sou wees…  Vir ons as Christene klink dit dalk vreemd, het hulle dan nie die profete gelees wat vertel het van die Messias wat sou kom as die lydende kneg van die Here nie? Vir ons is die woorde van Jesaja 52 en 53 tog goed bekend, Jesus het dit op Homself van toepassing gemaak. Maar die Jode in die tyd van Jesus se verwagting van ‘n Messias was beslis NIE as een wat sou kom ly nie! Inteendeel, hulle het ‘n glorieryke koninkryk verwag, ‘n terugkeer na die koningshuis van Dawid, met selfs nog meer mag en prag en praal.

Die Emmaus gangers praat van “ons leiers” en “ons profete” – hulle was kerkmense, hulle het geweet van die beloftes. Hulle het die profete geken, selfs saam met Jesus rondbeweeg. Hulle het geweet Jesus sou kom dien, maar hulle was blind daarvoor. Hulle het hul eie verwagting / idees gehad

So het hulle verwagtinge hulle blind gemaak vir wat, nee WIE, voor hulle oë staan. ‘n Koning sou hulle aanvaar, maar een wat aan ‘n kruis gesterf het, tog nie!

Toe kry die Emmaus gangers albei die dinge waarvan Eugene Peterson praat, ‘n antwoord en ‘n wonderwerk! Eers verduidelik Jesus aan hulle die profesieë, en toe nadat hulle Hom herken by die maaltyd, verdwyn Hy voor hulle oë.

Ons is gelukkig om vandag beide te hê – die antwoord en die wonderwerk! Ons het die hele Bybel, ons het Jesus se woorde, ons het Sy dissipels se nadenke oor Hom, ons het briewe waarin hulle mekaar onderrig en bemoedig het. Ons het meer as genoeg om ons te oortuig van God se liefde!

Daarby het ons ook die wonderwerk. Ons het God self wat deur Sy Gees in ons woon. Ons word elke dag herinner aan die wonderwerk van God se liefde vir ons!

Maar…  ons soek en bevraagteken nog al die tyd, ons sien die antwoorde wat voor ons oë is nie raak nie.

Hoekom? – Ons lees graag die Bybel selektief of glad nie, en so mis ons die boodskap. Ons is so verblind deur smart, woede, mismoedigheid dat ons vergeet van die wonderwerke en antwoorde wat God al vir ons vroeër gegee het  – ons geheue is net so kort soos die Emmaus gangers  Ons onthou net as dit goed gaan. As die swaar van die daaglikse gebroke wêreld ons tref dan vra ons waar is God? – hoekom laat Hy seer toe? – – in plaas daarvan om God se antwoord en God se wonderwerk wat alreeds in ons lewens gebeur het raak te sien!

Sien God raak! Help ander om God raak te sien!

(Met erkenning aan http://seisoenvanluister.co.za/) Read the rest of this entry »