Dominees en die dinge wat hulle aanvang, of so word beweer!

27 07 2010

Daar word baie grappies oor dominees (en MEVROU dominee) vertel.  Grappies wat wat eintlik maar net snaaks is omdat dit met die dominee (of MEVROU) gebeur! Tog het sekere van die dinge, wat vir my (nou) snaaks is, ook maar meegewerk om my te maak wie ek is. Op die einde was baie van die dinge nie net snaaks nie, maar het dit ook tot groei gelei.

Een van diesulke gebeurtenisse het gebeur so paar maande nadat ek in my eerste gemeente bevestig is. Ons moes ‘n kragkabel insit om die kerkgebou op ESKOM krag te kry. Geld vir die duur, en taamlik lang, kabel was daar nie. Ek probeer toe reël dat van die kerkraadslede sal kom help, dan grawe ons sommer self die sloot. Sodoende kan ons mos geld bespaar. Niemand is toe regtig bereid om te kom help grawe nie. My humeur was toe baie korter as nou, en ek reken toe, dan sal EK die sloot grawe!

Saterdagoggend kom, en ek is daar by die kerk met pik en graaf – heeltemal alleen! Hardekwas genoeg vir twee, begin ek die sloot grawe, in erg klipperige en rotsagtige grond! Na so 20 minute verskyn die hele kerkraad uit die kliprandjie bokant die kerk, waar hulle gesit en kyk het hoe dominee sy hand blase kap in die klippe – en gekyk het of die dominee werklik so ernstig is oor sy sloot. Elkeen kom gewapen met pik en graaf, en die sloot word toe nog die oggend kaf gedraf.

Wat ek moes leer, was dat byna my hele kerkraad uit plaasarbeiders bestaan het, en dat hulle Saterdagoggende werk. Hulle moes spesiaal afkry om my sloot te kom grawe. Het darem hieruit geleer om eers seker te maak van mense se programme en omstandighede voordat ek ‘n mal perd opsaal – o ja, en om nie toe te laat dat my humeur vir my blase op die hande veroorsaak nie!

‘n Tweede geleentheid was darem baie lekkerder. In dieselfde gemeente moes al die katkisante voor die hele kerkraad verskyn vir ‘n ondersoek voordat hulle toegelaat is om belydenis van geloof af te lê. Die oggend met die toets, is daar so stuk of 12 katkisante, meestal so 16 tot 18 jaar oud, met een oom wat al oor die 60 was. En is die jongklomp slim! Maak nie saak wat die kerkraad uit die katkisasie boek vra nie, die antwoord is daar. Ek merk op dat die ou oom nie so vinnig antwoord nie, maar sê niks, want ek weet hy kan nie lees of skryf nie. Verder kan sy katkiseermeester, oorlede oom Gert Stuurman, ook nie lees of skryf nie…

Op ‘n stadium vra die een ouderling toe ‘n vraag wat nie net so in die katkisasie boekie staan nie, iets soos “Wie was Jesus werklik en wat beteken Hy vir my vandag?” Daar is al die jong voor op die wa katkisante se bekke skielik vol tande! Die vraag vra so klein bietjie insig, eerder as net om die vragies in die boekie soos ‘n pappegaai te leer. En toe dit so stil word, toe trek die oom wat nie kan lees of skryf nie weg. En hy antwoord. ‘n Antwoord wat die beste professor in Godgeleerheid graag sou wou kon gegee het.  Hy haal woordeliks uit die Bybel uit aan. Hy trek konklusies. Hy trek dit deur na sy eie lewe. Hy haal nog uit die Bybel uit aan. Totdat ons almal stil is. En ons almal geleer het. Moenie dink ‘n man is dom omdat hy nie kan lees of skryf nie…


Aksies

Information

One response

13 08 2010
Jaco & Mara

Dankie

Jy neem my so vêr terug. . . . . so na die ystydperk . . . . van die “PW tyd” en soos die ys van die vergete (uit geheue gedrukte) onaangename memories smelt en die suksesse en aangename memories weer groen en so effens blommend uitgroei . . . . was dit lekker om weer jou skrywes te lees.

Die verlede het so ‘n stukkie “Augustus lente” gebring.

Jaco

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s




%d bloggers like this: